बैशाख २५ शुक्रवारदेखि प्रदर्शनमा आउन लागेको नेपाली चलचित्र गुरुआमा रिलिजअघि नै फिल्म बजारमा चर्चाको केन्द्र बनेको छ । प्रदर्शन सुरु हुन केही दिन बाँकी रहँदै खल्तीमा खुलेका २९ शोमध्ये करिब ५० प्रतिशत टिकट बुक भएको खबर बाहिरिएपछि चलचित्रको व्यापारिक सम्भावनालाई लिएर फिल्म वृत्तमा विभिन्न अड्कलबाजी सुरु भएका छन् ।कतिपयले यसलाई चलचित्रप्रतिको बढ्दो उत्साह र दर्शकको सकारात्मक चासोको संकेत मानेका छन् भने केहीले नेपाली फिल्म उद्योगमा बेला–बेला दोहोरिने “एड्भान्स बुकिङको रणनीति” सम्झेर प्रश्न पनि उठाइरहेका छन् । नेपाली फिल्म क्षेत्रमा पहिलो दिन हल खाली नदेखियोस् भनेर निर्माण पक्षकै सर्कलबाट टिकट किन्ने अभ्यास हुने गरेको चर्चा नौलो भने होइन । त्यसैले ‘गुरुआमा’को अग्रिम बुकिङलाई लिएर पनि यस्तै गफ बजारमा बाक्लिन थालेको देखिन्छ ।
यदि साँच्चै निर्माण पक्षकै तर्फबाट केही टिकट खरिद गरिएको हो भने त्यसलाई प्रचारात्मक रणनीतिको रूपमा बुझ्न सकिन्छ । किनकि पहिलो दिन हल भरिएको दृश्य देखाउन सकियो भने त्यसले अन्य दर्शकमाझ पनि सकारात्मक मनोविज्ञान सिर्जना गर्छ । अहिलेका धेरै दर्शकहरू सामाजिक सञ्जालमा “हाउसफुल” पोस्टर, भिडभाड भएका हल र चर्चाको माहोल देखेपछि फिल्मप्रति आकर्षित हुने प्रवृत्तिमा छन् । यही कारण कतिपय निर्माता पहिलो दिनको भीडलाई दोस्रो दिनको वास्तविक व्यापारमा रूपान्तरण गर्ने प्रयासमा रहने गर्छन् ।
तर यस्ता रणनीतिका आफ्नै सीमितता पनि छन् । किनकि आफैंले टिकट काटेर शो भरिएको देखाए पनि त्यो अन्ततः बाहिरी व्यापार होइन । पैसा एउटै समूहभित्र घुमेझैँ मात्रै हुने भएकाले फिल्मको वास्तविक सफलता भने दर्शकको प्रतिक्रिया र टिकाउ व्यापारमै निर्भर हुन्छ । यदि फिल्मले दर्शकको मन जित्न सकेन भने पहिलो दिनको कृत्रिम माहोल धेरै समय टिक्न सक्दैन ।
अर्कोतर्फ, चलचित्रको कथावस्तु शिक्षक–विद्यार्थी सम्बन्ध र सामाजिक भावनामा आधारित भएकाले स्कुल तथा कलेज तहबाट समूहगत टिकट बुकिङ भएको हुनसक्ने अनुमान पनि गरिएको छ । यदि त्यसो हो भने त्यो चलचित्रका लागि सकारात्मक पक्ष मान्न सकिन्छ । किनकि विषयवस्तुसँग सम्बन्धित दर्शक वर्ग आफैं फिल्म हेर्न उत्साहित हुनु कन्टेन्टप्रतिको विश्वासको संकेत हुन सक्छ ।
चलचित्रका निर्माता तथा निर्देशक प्रेम सोनी सुनार ले ‘गुरुआमा’लाई सामाजिक सन्देश बोकेको भावनात्मक कथा भएको बताएका छन् । फिल्ममा मिथिला शर्मा, बुद्धि तामाङ, सुशील पोखरेल लगायत कलाकारहरूको अभिनय रहेको छ भने विशेष भूमिकामा गौरी मल्ल र पूजा शर्मा देखिनेछन् । कलाकारहरूको उपस्थितिले पनि फिल्मप्रति दर्शकको चासो बढाएको देखिन्छ ।
अब भने चलचित्रको वास्तविक परीक्षा शुक्रवारपछि सुरु हुनेछ । किनकि नेपाली फिल्म बजारमा अग्रिम टिकट बुकिङले केही समय चर्चा र माहोल बनाउन सक्छ, तर अन्तिम निर्णय दर्शकको प्रतिक्रिया, सामाजिक सञ्जालमा आउने समीक्षा र मुखैमुखको प्रचारले नै गर्छ ।
फिल्म क्षेत्रमा एउटा पुरानो भनाइ छ — “पहिलो शो निर्माता चलाउँछ, दोस्रो शो दर्शकले ।” ‘गुरुआमा’का हकमा पनि यही कुरा लागू हुनेछ । बाहिर पोस्टरमा ‘सोल्ड आउट’ चम्किए पनि अन्ततः कुन फिल्म नाफामा गयो र कुन घाटामा, त्यो हिसाब सबैभन्दा पहिले निर्माताको खल्तीले नै बताउनेछ ।
