पोखरा – गुरुङ समुदायको मौलिक संस्कृति, पहिचान र जीवनशैलीलाई केन्द्रमा राखेर निर्माण गरिएको गुरुङ फिल्म ‘तेनो कुर्सी’ ढोगभेट मंसिर २४ गते पोखराको ट्रेडमल (QFX) मा पहिलो विशेष प्रदर्शनसहित दर्शकमाझ प्रस्तुत गरिएको छ। पहिलो दिनमै हल भरिएका दर्शक र उत्कृष्ट प्रतिक्रियाले निर्माण टोली उत्साहित बनेको छ।उक्त विशेष प्रदर्शनपछि फिल्म मंसिर २७ र २८ गते पोखराको श्रीकृष्ण चलचित्र भवनमा पुनः प्रदर्शन हुँदैछ। पोखराबाट निरन्तर मिलिरहेको दर्शकको साथ र माया फिल्मलाई थप चर्चित बनाइरहेको निर्माण पक्षले जनाएको छ।निर्देशक तथा लेखक **सुबास गुरुङ (गणेश)**को निर्देशनमा तयार गरिएको ‘तेनो कुर्सी’ ढोगभेट गुरुङ समुदायको सामाजिक परिवेश, सांस्कृतिक मूल्य, संघर्ष, परम्परा र भावनात्मक नाता समेटिएको कथामा आधारित छ।
फिल्मले परम्परागत गुरुङ जीवनपद्धति, परिवारभित्रका सम्बन्ध, संस्कार र समुदायभित्रको एकता निकै संवेदनशील ढंगले प्रस्तुत गर्छ। पछिल्ला वर्षहरूमा ‘तमु चलचित्र’ हरूले नेपाली फिल्म क्षेत्रमा छुट्टै पहिचान बनाइरहेको समयमा ‘तेनो कुर्सी’ पनि सोही यात्राको महत्वपूर्ण कडी बन्ने अपेक्षा गरिएको छ।पहिलो प्रदर्शनीमा कलाकारहरूलाई विशेष सम्मानसमेत गरिएको थियो। विभिन्न क्षेत्रका सम्मानित व्यक्तिहरू, स्थानीय कलाकार, पत्रकार र गुरुङ समुदायका दर्शकहरूको बाक्लो उपस्थिति रह्यो।दर्शकहरूले कलाकारहरूको स्वाभाविक अभिनय, सांस्कृतिक प्रस्तुतीकरण, भावनात्मक कथा र मौलिक परिवेशको यथार्थ चित्रणलाई प्रशंसा गरेका छन्।
हङकङ निवासी निर्माण टोलीको समर्पण
फिल्मका निर्माताहरू चन्द्र गुरुङ, भिमबहादुर गुरुङ, कुमार गुरुङ, जयलक्ष्मी गुरुङ र ज्ञानु गुरुङ—सबै हङकङ निवासी हुन्। विदेशमा बसेर पनि आफ्नो भाषा, संस्कृति र पहिचानलाई जोगाउन तथा विश्वभर फैलाउन उनीहरूको योगदान निकै प्रेरणादायी रहेको निर्माण पक्षले जनाएको छ।चलचित्रमा पर्वत गुरुङ, खुशी गुरुङ, टिका राम घले, पूजा गुरुङ, राजेश गुरुङ, बबिता गुरुङ, ओम गुरुङ, एलिशा गुरुङ, भिम गुरुङ, मन्जु गुरुङ र रिना गुरुङको दमदार अभिनय समावेश छ।छायांकन बिशाल प्रजापति र **प्रकाश गुरुङ (काश)**ले गरेका छन् भने सम्पादन तथा रंग संयोजन राजेन्द्र खड्काले सम्हालेका छन्।संगीत पक्षलाई आशु लामा कौरा, शीर्ष गीतलाई सुबाश गुरुङले सम्हालेका छन्। गीतहरूमा गणेश गुरुङ (सुबाश), मेलिना राई, उषा गुरुङको सुमधुर स्वर सुन्न सकिन्छ। कोरियोग्राफी कमल गुरुङले गरेका छन्।
देश–विदेशमा प्रदर्शनको तयारी अन्तिम चरणमा
पोखरामा सफल विशेष प्रदर्शनपछि ‘तेनो कुर्सी’ अब छिट्टै नेपालका विभिन्न शहरहरूमा प्रदर्शन हुँदैछ। साथै विदेशमा बस्ने नेपाली तथा गुरुङ समुदाय धेरै रहेको हङकङ, यूके, युएई, अस्ट्रेलिया, कोरिया, जापानलगायत मुलुकमा पनि प्रदर्शनको तयारी अन्तिम चरणमा पुगेको छ।चलचित्र प्रदर्शन अगावै नै दर्शकको उत्साहजनक चासो र बढ्दो मागले निर्माण टोलीलाई थप ऊर्जा मिलेको बताइएको छ।
