नेपाली लोकदोहोरी तथा मौलिक गीत–संगीतको क्षेत्रमा गहिरो छाप छाड्न सफल गायक पशुपति शर्मा फेरि एकपटक नयाँ र चेतनामूलक गीत लिएर दर्शकमाझ आएका छन्। “खै तिमीले बुझेको…” नामक यस गीतमा पशुपति शर्मासँगै गायिका नितु थापा मगरको सशक्त स्वर सुन्न सकिन्छ।गीतका शब्द र संगीत दुवै स्वयं गायक पशुपति शर्माले तयार पारेका छन्, जसले गीतको भावनात्मक गहिराइलाई अझ प्रभावशाली बनाएको छ। गीतमा सामाजिक, पारिवारिक तथा व्यक्तिगत भावनालाई कलात्मक रूपमा प्रस्तुत गरिएको छ।संगीत संयोजन विश्वास नेपालले गरेका हुन् भने भिडियो निर्देशन तथा कोरियोग्राफीको जिम्मेवारी मुकेश नेपालीले सम्हालेका छन्।
उनीहरूको समन्वयले गीतको भाव र भिडियोको प्रस्तुतिलाई एकदमै जीवन्त बनाएको देखिन्छ। भिडियोमा करिश्मा ढकाल, सरद एलजी र लक्ष्मी थापा मगरको अभिनय देख्न सकिन्छ। तिनै कलाकारहरूले गीतको कथावस्तु अनुसार जीवन्त अभिनय प्रस्तुत गरेका छन्। अजय रेग्मी र उनको टोलीले गीतको छायांकन गरेका छन्। दृश्यहरूसँगै परिवेश र भावनालाई समेट्न सफल सिनेमाटोग्राफीले भिडियोको स्तर अझ उचो बनाएको छ। सम्पादन नबिन घर्ती मगरले गरेका हुन्, जसले कथा र भावलाई स्पष्ट रूपमा प्रस्तुत गर्न सघाएको छ।
“खै तिमीले बुझेको…” केवल प्रेमगीत होइन, यो एक चेतनासँग जोडिएको सिर्जना हो। गीतमा माया, गलतफहमी, सामाजिक असमझदारी र त्यसमाथिको गहिरो व्यथालाई उजागर गरिएको छ। हरेक श्रोता/दर्शकले आफूलाई गीतको कथामा कतै न कतै भेट्न सक्छ। पशुपति शर्मा नेपाली लोकगायनको क्षेत्रमा लोकप्रिय नाम हो। सामाजिक बिषय, जनचासो, र समसामयिक यथार्थ बोल्ने गीतमार्फत उनले दर्शकको मन जित्दै आएका छन्। यसपटक पनि उनले फरक स्वादको गीत लिएर आएका छन् जसले मनोरञ्जनमात्र नभई सोच्न बाध्य बनाउँछ।”खै तिमीले बुझेको…” गीतले नेपाली मौलिकताको गन्ध बोकेको छ। सशक्त शब्द, भावनात्मक संगीत, उत्कृष्ट गायन, र सशक्त अभिनय समेटिएको यस गीतले श्रोता-दर्शकहरूमा गहिरो प्रभाव पार्ने अपेक्षा गरिएको छ। गीतले दर्शकको मनमाथि गहिरो छाप छोड्ने पक्का देखिन्छ।
