काठमाडौँ। नेपाली सांगीतिक आकाशमा आफ्ना पृथक् र मनछुने सिर्जनामार्फत पहिचान बनाउन सफल गायक तथा सङ्गीतकार विजय गुरुङ र बहुप्रतिभाशाली गायिका तथा सङ्गीतकार तृप्ति खड्का गुरुङको संयुक्त सांगीतिक कोसेली ‘साउनको पानी’ बजारमा आएको छ। प्रेम, समर्पण, पुराना मीठा सम्झना र वर्षायामको रूमानी भावनालाई कलात्मक ढङ्गले उनेर तयार पारिएको यस गीतले सार्वजनिक हुनासाथ नेपाली सङ्गीतप्रेमीहरूको मन जित्न थालेको छ।साउनको रिमझिम झरीसँगै मनमा जाग्ने माया-पिरती, पुराना अतितका पलहरू र भावनात्मक अनुभूतिलाई गीतमा असाध्यै सुन्दर रूपमा प्रस्तुत गरिएको छ। गायक विजय गुरुङको जीवन्त शब्द रचना तथा तृप्ति खड्का गुरुङको मधुर सङ्गीत सिर्जना रहेको यस गीतमा तृप्ति खड्का गुरुङ र गायक वैकुण्ठ प्रधानको मनमोहक स्वर सुन्न सकिन्छ। दुवै गायक-गायिकाको सुमधुर स्वर-मिश्रणले गीतमा बेग्लै सुगन्ध थपेको छ।
तकनीकी रूपमा पनि निकै उत्कृष्ट बनाइएको यस गीतको सङ्गीत संयोजन (एरेन्ज), मिक्सिङ तथा मास्टरिङ चर्चित सङ्गीतकर्मी नरेश पाण्डेले गरेका हुन्। गीतको रेकर्डिङ तथा निर्माण सारेगामा स्टुडियोमा गरिएको हो भने यसको श्रव्य तथा दृश्य (अडियो/भिडिओ) निर्माणको सम्पूर्ण संयोजन तृप्ति खड्का गुरुङकै विशेष सक्रियता र पहलमा सम्पन्न भएको हो।गीत जति मिठासपूर्ण छ, यसको दृश्य-भिडिओ पनि त्यतिकै आकर्षक बनेको छ। भिडिओमा स्वयं विजय गुरुङ र मोडल पुजन घिमिरेको जीवन्त अभिनय र प्रेमिल केमेस्ट्री देख्न सकिन्छ। साउनको पानीमा रुझ्दै पोखिएको प्रेम र वर्षाको भावनालाई दृश्यात्मक रूपमा पर्दामा उतार्न निर्देशक विजय गुरुङ आफैँले निर्देशनको कमान सम्हालेका छन्।
प्राविधिक पक्षतर्फ, भिडिओको उत्कृष्ट छायाङ्कन प्रकाश खड्काले गरेका हुन् भने सन्तोष खाती र अर्जुन एडीको आकर्षक नृत्य निर्देशन रहेको छ। दृश्यहरूलाई आकर्षक एवं रङ्गीन बनाउने काम (सम्पादन तथा कलर ग्रेडिङ) ड्रागन पिक्चर्स प्रालिमा मिलन विश्वकर्माले गरेका हुन्। कलाकारहरूको सजावटमा चन्द्र गुरुङको मेकअप र सारिका बुटिक एन्ड कलेक्सनको सुन्दर पहिरन (पोसाक) रहेको छ।
त्यस्तै, दृश्यलाई जीवन्त बनाउन प्रकाश व्यवस्थापनमा लक्ष्मण खड्का, लोकेश ओली र ओमप्रकाश खड्का तथा क्यामेरा व्यवस्थापनमा प्रशान्त केसीले प्राविधिक सहयोग पुर्याएका छन्।सारेगामा स्टुडियोको आधिकारिक प्रस्तुतिमा बजारमा ल्याइएको यो गीतले नेपाली मौलिक तथा सुगम सङ्गीतको निरन्तर यात्रालाई अझ प्रगाढ बनाएको छ। साउनको झरी, प्रेम र स्मृतिसँग जोडिएका प्रत्येक श्रोता–दर्शकका लागि यो गीत एक सुमधुर सांगीतिक उपहार साबित हुने अपेक्षा गरिएको छ। उत्कृष्ट सिर्जनालाई सम्मान गर्दै दर्शक-श्रोताले गीतलाई हेरेर, सुनेर तथा लाइक, कमेन्ट र सेयर गरी कलाकारहरूलाई हौसला प्रदान गर्न निर्माण टिमले आग्रह गरेको छ।
