नेपाली लोक तथा दोहोरी संगीतको क्षेत्रमा फेरि एउटा उत्कृष्ट र रमाइलो साङ्गीतिक कोसेली थपिएको छ। स्थापित एवं लोकप्रिय कलाकारहरूको स्वर र अभिनयले सजिएको नयाँ लोक दोहोरी गीत ‘उमेर ५५’ भर्खरै बजारमा सार्वजनिक भएको हो। यो गीत वास्तविक जीवनको सत्य कथामा आधारित भएर निर्माण गरिएको निर्माण पक्षले जनाएको छ।चर्चित गीत ‘गोठको बाटो’ को अपार सफलतापछि सुमधुर आवाजकी धनी गायिका लक्ष्मी परियारले आफ्नो नयाँ प्रस्तुतिको रूपमा यो नयाँ गीत बजारमा ल्याएकी हुन्।
यस गीतमा गायिका लक्ष्मी परियारका साथमा युवा पुस्तामाझ निकै रुचाइएका लोकप्रिय गायक चिज गुरुङ र प्रतिभाशाली गायक अर्जुन गहतराजको त्रिकोणात्मक स्वर सुन्न पाइनेछ। गीतको मर्मस्पर्शी, यथार्थपरक एवं ठट्टापूर्ण शब्द र संगीत स्वयम् अर्जुन गहतराजले तयार पारेका हुन्।गीतलाई वरिष्ठ संगीत संयोजक राजेन्द्र बाजुरालीले एरेन्ज गरेका हुन् भने यसको रेकर्डिङ सागर बाजुराली रेकर्डिङ स्टुडियोमा गरिएको हो। अडियोलाई थप परिष्कृत र स्तरीय बनाउने काम (मिक्सिङ/मास्टरिङ) वरिष्ठ प्राविधिक खड्क बाजुरालीले गरेका छन्। यो गीत आधिकारिक रूपमा ‘Laxmi Pariyar Official’ युट्युब च्यानलबाट रिलिज गरिएको छ।चलचित्र तथा म्युजिक भिडियो क्षेत्रका चर्चित कलाकार विजय पुन र सम्झना बुढाथोकीको मुख्य अभिनय रहेको यस गीतको भिडियो निकै उत्कृष्ट र जीवन्त बनेको छ। सत्य घटनाको मर्मलाई छुने गरी यसको कथावस्तु अर्जुन गहतराजले बुनेका हुन् भने निर्देशक विजय मगरले यसलाई कलात्मक रूपमा पर्दामा उतारेका छन्। कलाकारहरूलाई उत्कृष्ट नृत्यको तालमा अभ्यस्त गराउने काम कोरियोग्राफर खगेन्द्र गिरीले गरेका हुन्।
पछिल्लो समयका व्यस्त सिनेमाटोग्राफर महेश महरा र उनको टिमले खिचेको यस भिडियोको सम्पादन तथा रङ संयोजन (Edit/Color) मीन रावलले गरेका छन् भने सहायक सम्पादकको रूपमा दीपक देउबा रहेका छन्।सत्य कथाको गहिराइ, उत्कृष्ट गायकी र स्तरीय भिडियो निर्माणका कारण ‘उमेर ५५’ ले युट्युब र टिकटक जस्ता डिजिटल प्लेटफर्ममा छोटो समयमै ‘गोठको बाटो’ जस्तै फेरि अर्को ठुलो रेकर्ड राख्ने सङ्केत देखाएको छ।
