देशमा हालै सम्पन्न संसदीय निर्वाचनको माहोल सेलाउन नपाउँदै अब नेपाली कला क्षेत्र पनि चुनावी माहोलमा प्रवेश गर्ने भएको छ। Nepal Film Artists Association को २१औँ साधारणसभा तथा नयाँ नेतृत्व चयनका लागि निर्वाचन २०८२ साल चैत २८ गते सम्पन्न हुने तय भएको जानकारी प्राप्त भएको छ।उक्त साधारणसभासँगै हुने निर्वाचनमा विभिन्न पदका लागि कलाकारहरूले उम्मेदवारी दिने क्रम सुरु भएको छ। सोही क्रममा सह–कोषाध्यक्ष पदका लागि कलाकार Roshan Shrestha ले आफ्नो उम्मेदवारी घोषणा गरेका छन्। लामो समयदेखि नेपाली कला क्षेत्रमा सक्रिय रहँदै आएका श्रेष्ठले संस्थागत विकास र कलाकारहरूको हितका लागि आफूले चुनावमा प्रतिस्पर्धा गर्ने निर्णय गरेको बताएका छन्।कलाकार रोशन श्रेष्ठ नेपाली चलचित्र क्षेत्रमा विगत लामो समयदेखि निरन्तर सक्रिय रहँदै आएका कलाकार हुन्। उनले अभिनय क्षेत्रसँगै नेपाल चलचित्र कलाकार संघ भित्र पनि विभिन्न गतिविधिमा संलग्न भएर कलाकारहरूको हकहित र संस्थाको सुदृढीकरणका लागि इमान्दारीपूर्वक काम गर्दै आएको धेरै कलाकारहरू बताउँछन्। यही अनुभव र सेवाभावलाई निरन्तरता दिन आफूले सह–कोषाध्यक्ष पदमा उम्मेदवारी दिएको श्रेष्ठले बताएका छन्।
उम्मेदवारी घोषणा गर्दै श्रेष्ठले कलाकार समुदायलाई संस्थाको हितलाई केन्द्रमा राखेर मतदान गर्न आग्रह गरेका छन्। उनले भनेका छन्, “संघ हाम्रो साझा संस्था हो। यसलाई अझ सशक्त र व्यवस्थित बनाउन सबै कलाकारहरूको साथ र सहयोग आवश्यक छ। मभन्दा पनि राम्रो सोच, योजना र नेतृत्व क्षमता भएको व्यक्ति भए उसलाई जिताउनुहोस्। तर संस्थालाई इमान्दारी र जिम्मेवारीका साथ अघि बढाउने नेतृत्व चयन गर्नु सबै कलाकारको दायित्व हो।”श्रेष्ठले विगतका दिनहरूमा जस्तै आगामी दिनमा पनि पारदर्शिता, जिम्मेवारी र समर्पणका साथ काम गर्ने प्रतिबद्धता व्यक्त गरेका छन्। उनले कलाकारहरूको हकहित, संस्थाको आर्थिक पारदर्शिता, कलाकारबीच एकता र सहकार्य बढाउन आफूले विशेष पहल गर्ने बताएका छन्।उनले सम्पूर्ण कलाकारहरूलाई आगामी निर्वाचनमा सक्रिय रूपमा सहभागी हुन र आफ्नो अमूल्य मत प्रयोग गर्न आग्रह पनि गरेका छन्। “तपाईंहरूको अमूल्य मत र विश्वासलाई म सधैँ सम्मान गर्नेछु। विगतमा जस्तै आगामी दिनहरूमा पनि संस्थाको विकास र कलाकारहरूको हितका लागि निरन्तर काम गर्ने वाचा गर्दछु,” श्रेष्ठले भने।नेपाली चलचित्र क्षेत्रसँग सम्बन्धित कलाकारहरूको साझा संस्था भएकाले नेपाल चलचित्र कलाकार संघ को निर्वाचनलाई कला क्षेत्रभित्र महत्वपूर्ण रूपमा हेरिएको छ। यस निर्वाचनले आगामी कार्यकालका लागि संस्थाको नेतृत्व चयन गर्ने भएकाले कलाकारहरूबीच अहिले नै चुनावी चर्चा र तयारी सुरु भइसकेको छ।आगामी चैत २८ गते हुने २१औँ साधारणसभा तथा निर्वाचनले कलाकार संघको भविष्यको दिशा निर्धारण गर्ने विश्वास गरिएको छ। कलाकारहरूबीच सहकार्य, पारदर्शिता र संस्थागत मजबुतीको अपेक्षा गरिएको यस निर्वाचनले नेपाली चलचित्र क्षेत्रलाई अझ संगठित र सक्रिय बनाउने आशा गरिएको छ।
