नेपाली गीत–संगीत क्षेत्रमा नयाँ तर सशक्त उपस्थिति जनाइरहेकी प्रतिभाशाली गायिका लिजा लामा र अनुभवी गायक तथा निर्माता राजु लामाको स्वरमा सजिएको लोकगीत ‘पानी घट्टामा’ सार्वजनिक भएको छोटो समयमै चर्चामा आएको छ। साइराम पिक्चर्स युट्युब च्यानलमार्फत सार्वजनिक भएको यस गीतले दर्शक तथा श्रोतामाझ सकारात्मक प्रतिक्रिया पाइरहेको छ।झट्ट हेर्दा कुनै चलचित्रकी नायिका जस्तै देखिने सुन्दरी गायिका लिजा लामा वास्तवमा नेपाली गीत–संगीत क्षेत्रमा सानै उमेरदेखि निरन्तर साधनामा जुटिरहेकी एक प्रतिभाशाली गायिका हुन्। कम उमेरमै संगीत यात्रामा होमिएकी लिजा लामाले हालसम्म करिब १५ देखि २० वटा गीतमा स्वर दिइसकेकी छन्। निरन्तर मेहनत र लगनशीलताका कारण उनी बिस्तारै श्रोतामाझ चिनिन थालेकी छन्।
लोक भाकामा आधारित ‘पानी घट्टामा’ गीतमा लिजा लामासँगै गायक राजु लामाको सुमधुर स्वर सुन्न सकिन्छ। यस गीतको विशेष पक्ष भनेको गायक राजु लामा गायिका लिजा लामाका आफ्नै बुबा हुनु हो। बाबा–छोरीबीचको यो सांगीतिक सहकार्यले गीतलाई अझ भावनात्मक र अर्थपूर्ण बनाएको छ। पारिवारिक माया र संगीतको सुन्दर संयोजनले दर्शकको मन जित्न सफल देखिन्छ।राजु लामा केवल एक कुशल गायक मात्र नभई सफल नेपाली चलचित्र निर्माता समेत हुन्। उनले निर्माण गरेका चर्चित चलचित्रहरूमा क्यरिङ ग्याङ, तिम्रो घर मेरो ससुराली, ज्यानको बाजी र खेल खेलाडी जस्ता फिल्महरू समावेश छन्। छोरीको प्रतिभा पहिचान गर्दै उसको सपना पूरा गर्न एक बाबाले देखाएको समर्पण र साथले धेरै अभिभावकहरूलाई प्रेरणा दिने अपेक्षा गरिएको छ।गीतमा संगीत तथा संगीत संयोजन मनोज चौलागाईंको रहेको छ भने शब्द रचना चन्द्रलाल तामाङले गरेका हुन्। भिडियो पक्ष पनि उत्तिकै सशक्त बनेको छ। नृत्य निर्देशक तथा कोरियोग्राफर हेमन्त पाण्डेको निर्देशनमा तयार भएको भिडियोमा कलाकारका रूपमा राजु लामा र ममता गिरीको अभिनय तथा नृत्य देख्न सकिन्छ, जसले गीतको भावलाई अझ जीवन्त बनाएको छ।
त्यसैगरी, भिडियोमा ड्रोन तथा क्यामेरा अंकेश आरसी, सहायक नृत्य निर्देशक सदिक्ष्या विश्वकर्मा तथा कोरस नृत्य समूहमा पीडीएच डान्स स्टुडियो, लमही दाङको सहभागिता रहेको छ। सम्पूर्ण टिमको सामूहिक मेहनतले भिडियो पक्ष आकर्षक र प्रभावशाली बनेको देखिन्छ।‘पानी घट्टामा’ गीतमार्फत एक बुबा–छोरीबीचको माया, विश्वास र आफ्ना सन्तानको सपना साकार पार्न अभिभावकको भूमिका कति महत्वपूर्ण हुन्छ भन्ने सन्देश दिन खोजिएको छ। लोक स्वादमा आधारित यस गीतले नेपाली गीत–संगीत क्षेत्रमा नयाँ आयाम थप्ने अपेक्षा गरिएको छ।गायिका लिजा लामाको आत्मविश्वासी स्वर, प्रस्तुति र प्रतिभाले नेपाली संगीत क्षेत्रमा उनको भविष्य उज्यालो देखिएको अनुभूति गराउँछ।
यदि तपाईंले अहिलेसम्म यो गीत हेर्नु वा सुन्नु भएको छैन भने, YouTube मा “Liza Lama” सर्च गरेर वा साइराम पिक्चर्स च्यानलमार्फत हेर्न सक्नुहुनेछ। गीत हेरेपछि आफ्नो प्रतिक्रिया दिन नबिर्सनुहोला।
