‘ङोल्स्यो रामरानी’ अब गोरखा भिर्शिङमा — सफल प्रदर्शनको यात्रा निरन्तर, गुरुङ संस्कृतिको शक्ति पर्दामा झनै उजागर
पोखरा, चितवन, धादिङ, हङकङ र काठमाडौँजस्ता स्थानहरूमा लगातार सफल प्रदर्शनपछि अब गुरुङ फिल्म ‘ङोल्स्यो रामरानी’ आगामी मंसिर ११ गते गोरखा भिर्शिङ गाउँमा भव्य रूपमा प्रदर्शन हुन लागेको छ।
गुरुङ संस्कृति, भाषा र पहिचानलाई आधुनिक नेपाली सिनेमाको माध्यमबाट अभिव्यक्त गर्ने उद्देश्यले निर्माण गरिएको यो फिल्म हर ठाउँमा दर्शकको अत्यधिक रुचि र प्रेम बटुल्न सफल हुँदै आएको छ।यसअघि काठमाडौँमा कार्तिक २९ गते शनिबार विशेष रूपमा आयोजना गरिएको प्रिमियर शो अत्यन्तै सफल र स्मरणीय रह्यो। हलमा उपस्थित दर्शकहरूको आँखामा झरेका आँसु, छचल्किएको उत्साह, र प्रदर्शनीपछि सुनिएका ताली–जयकारहरूले चलचित्रले दर्शकका मन छोएको स्पष्ट संकेत गरेको थियो।
देश–विदेशमा ‘ङोल्स्यो रामरानी’को लोकप्रियता चुलिँदै
पोखरा, चितवन, धादिङ, हङकङदेखि राजधानी काठमाडौँसम्म ‘ङोल्स्यो रामरानी’ले हाउसफुल शोहरु दिएर गुरुङ चलचित्र क्षेत्रको उचाइ अझै बढाएको छ। जहाँ जहाँ प्रदर्शन भयो, त्यहाँ फिल्मले पाएको समर्थन, उत्साह, र दर्शकले दिएको सकारात्मक प्रतिक्रियाले निर्माण पक्षलाई थप उर्जा, आत्मविश्वास र प्रेरणा दिएको छ।हालका वर्षहरूमा गुरुङ भाषामा निर्माण भएका चलचित्रहरूले नेपाली सिनेमामा छुट्टै पहिचान बनाइरहेका छन्। ‘तमु चलचित्र’हरूको लोकप्रियता देश–विदेशमा तीव्र गतिमा बढिरहेको छ, जसले गुरुङ समुदायको मौलिकता, भाषिक सम्पदा र सांस्कृतिक जीवनशैलीलाई वैश्विक मञ्चमा पुर्याइरहेको छ।त्यही निरन्तरतामा, मुनाल फिल्म प्रालिको ब्यानरमा निर्माण भएको ‘ङोल्स्यो रामरानी’ गुरुङ संस्कृतिको आत्मा, परम्परा, भावनात्मक नाता र सामुदायिक पहिचानलाई शक्तिशाली रूपमा प्रस्तुत गर्दै देशभर चर्चा बटुल्न सफल भएको छ।
प्रिमियर शोमा जम्यो गुरुङ समुदायका कलाकार, समाजसेवी र चर्चित हस्तीहरू
काठमाडौं प्रिमियरमा गुरुङ चलचित्र क्षेत्रमा सक्रिय वरिष्ठ कलाकारदेखि समाजसेवी, विभिन्न पेशा–व्यवसायका व्यक्तित्व, तथा चर्चित गायक–गायिकाको उल्लेखनीय उपस्थिति थियो।
उनीहरूले चलचित्रप्रति प्रशंसा व्यक्त गर्दै भने—गुरुङ भाषा–संस्कृतिमा आधारित चलचित्रहरू अब राष्ट्रिय पहिचान निर्माणका आधारस्तम्भ बन्न थालेका छन्।”फिल्मले प्रस्तुत गरेको मौलिक पहिचान, कथाको भावनात्मक गहिराइ, र पात्रहरूको जीवन्त अभिनयले कार्यक्रममा उपस्थित अग्रज र नयाँ पुस्ता दुवैको मन जितेको थियो।
दमदार अभिनय, जीवन्त कथा र वास्तविक गाउँघरको कथा
चलचित्रमा राम प्रसाद गुरुङ, विष्णु गुरुङ, सपना गुरुङ, इशा गुरुङ, रेशम गुरुङलगायतका कलाकारहरूको दमदार अभिनय देख्न पाइन्छ।कथा बिबेक गुरुङ, पटकथा जनक गुरुङ, निर्देशन बिबेक गुरुङ— यी सबैले यसअघि गुरुङ भाषाका फिल्ममा दिएको योगदानलाई दर्शकले निरन्तर मन पराउँदै आएका छन्।यो पटक पनि ‘ङोल्स्यो रामरानी’ले गाउँ–घरको वास्तविक जीवनशैली, प्रेम, सामाजिक सम्बन्ध र संस्कृतिको जरा–जरा समेटेर दर्शकको मनलाई छोएको प्रतिक्रिया प्राप्त भइरहेको छ।निर्माण टिमका अनुसार चलचित्रले गुरुङ समुदायको संस्कार, संस्कृति, पहिचान र सामुदायिक सन्देशलाई अत्यन्त संवेदनशील तर सशक्त रूपमा प्रस्तुत गरेको छ। युवा पुस्तामा आफ्नो भाषा, पहिचान र संस्कृतिप्रतिको गर्व बढाउने उद्देश्य फिल्मको केन्द्रीय संदेश हो।
देश–विदेशमा प्रदर्शनको माग बढ्दै, दर्शकको उत्साहले निर्माण टिम उत्साहित
मुख्य कलाकार तथा नायक राम प्रसाद गुरुङका अनुसार देशका अन्य स्थानसँगै विभिन्न विदेशी शहरहरूबाट पनि ‘ङोल्स्यो रामरानी’ प्रदर्शनको माग बढिरहेको छ।उनका अनुसारफिल्मप्रतिको दर्शकको उच्च अपेक्षा र रुचिले हामीलाई देश–विदेशका दर्शकसमक्ष गुरुङ संस्कृतिको सौन्दर्य पुर्याउने ठूलो जिम्मेवारी दिएको छ।”फिल्मले गुरुङ समुदाय मात्र होइन, नेपाली समाजमै मौलिकताको शक्ति, भाषिक विविधता र स्थानीय संस्कृतिको महत्त्व के हो भन्ने कुरा पुनः स्मरण गराएको छ।
