मिर्गौला प्रत्यारोपणका लागि ‘अर्धचन्द्र’ चलचित्रको विशेष प्रदर्शन, उठेको रकम २९ वर्षीया विष्णु गुरुङको उपचारमा सहयोग गरिने |

काठमाडौं । गोरखाको बरपाक सुलिकोट गाउँपालिका–बरपाक निवासी २९ वर्षीया विष्णु गुरुङ विगत ७/८ वर्षदेखि दुवै मिर्गौला फेल भई उपचाररत छन्। हाल काठमाडौंमा उपचार गराइरहेकी विष्णुको जीवन बचाउन मिर्गौला प्रत्यारोपण आवश्यक भए पनि आर्थिक अभावका कारण परिवार ठूलो समस्यामा परेको छ।परिवारका अनुसार विष्णुलाई उनका जन्मदिने बाबुले मिर्गौला दान गर्ने निर्णय गरिसकेका छन्। तर मिर्गौला प्रत्यारोपणका लागि आवश्यक पर्ने ठूलो रकम जुटाउन नसक्दा उपचार प्रक्रिया अघि बढाउन कठिनाइ भइरहेको छ।यही मानवीय उद्देश्यलाई सहयोग पुर्‍याउन गुरुङ चलचित्र ‘अर्धचन्द्र’ को विशेष च्यारिटी प्रदर्शन आयोजना गरिएको छ। चलचित्र प्रदर्शनबाट संकलन हुने सम्पूर्ण रकम विष्णु गुरुङको मिर्गौला प्रत्यारोपण तथा उपचारमा सहयोग गरिने आयोजकले बताएका छन्।विशेष प्रदर्शन यस महिनाको २७ गते काठमाडौंको गोंगबुस्थित इन्फिनिटी सिनेमामा हुने तय भएको छ। आयोजकले चलचित्र हेरेर उपचार अभियानमा साथ दिन सम्पूर्ण नेपाली समुदायलाई आग्रह गरेका छन्।आयोजकका अनुसार एउटा टिकट खरिद गरेर चलचित्र हेर्दा मनोरञ्जनसँगै गम्भीर स्वास्थ्य समस्यासँग संघर्ष गरिरहेकी एक युवतीको जीवन बचाउने अभियानमा पनि सहभागी हुने अवसर प्राप्त हुनेछ।सहयोग अभियानका संयोजक प्रेम गुरुङ (गोरखा) ले सबै मनकारी व्यक्तिहरूलाई सकेको आर्थिक सहयोग गर्न तथा चलचित्र हेरेर अभियानलाई सफल बनाउन अनुरोध गरेका छन्। सहयोग गर्न इच्छुक व्यक्तिले आयोजकले उपलब्ध गराएको सम्पर्क नम्बरमार्फत पनि सहयोग गर्न सक्ने जनाइएको छ।9713870002“हामी सबैको सानो सहयोगले कसैको जीवनमा नयाँ आशा र नयाँ जिन्दगी दिन सक्छ। आउनुहोस्, चलचित्र ‘अर्धचन्द्र’ हेरेर मानवीय सेवामा हातेमालो गरौँ,” आयोजकको आग्रह छ।